seirler.info

    (Cəfər Cabbarlı)
    
    Əgər bütün bəşəriyyət ədüvvi-canım ola,
    Ürək süqut eləməz aldığı mətanətdən.
    Ricavü xəvfə məkan vermərəm gər alimlər
    Min il də vəz edələr dəhşətü-qiyamətdən.
    
    Pələnglər tuta dövrüm, çəkinmərəm əsla,
    Və ya ki, vəd edələr dövləti-cahanı mənə
    Ki, bir kəsə baş əyib içzimi bəyan eləyim,
    Əyilmərəm nə ki yer, versələr səmanı mənə.
    
    Yanımda gər dura cəllad əlində şəmşiri,
    Ölüm gücilə mənə hökm edə olum təslim,
    Əyilmərəm yenə haşa! Ölüm nədir ki, onun
    Gücilə xalqa həqiranə eyləyim təzim?
    
    Cahanda yox elə bir qüvvə baş əyim ona mən,
    Fəqət nə güclü, zəif bir vücud var, yahu,
    Ki, hazıram yıxılıb xaki-payinə hər gün,
    Öpüm ayağını əcz ilə. Kimdir o? Nədir o?
    
    Ana! Ana!.. O adın qarşısında bir qul tək
    Həmişə xidmətdə olmaq mənə fəxarətdir,
    Onun əliylə bəla bəhrinə yuvarlansam,
    Yenə xəyal edərəm bəzmi-istirahətdir.
    
    Əs, ey külək, bağır, ey bəhri-biaman, ləpələn!
    Atıl cahana sən, ey ildırım, alış, parla!
    Gurulda, taqi-səmavi, gurulda, çatla, dağıl!
    Sön, ey günəş, yağışın yağdır, ey bulud, ağla!
    
    Bunlar mənə əsər eylərmi ? Mütləqa yox! Yox!- Yox!!!
    Fəqət Ana! O müqəddəs adın qabağında-
    O pak bağrına bassın məni, desin layla,
    Təbəssüm oynadaraq titrəyən dodağında.
    
    Bütün vücudum əsər, ruhum eyləyər pərvaz,
    Uçar səmalara o, aləmi-xəyalətdə.
    Yatar, ölər bədənim, nitqdən düşər bir söz:
    -Ana… Ana… Sənə mən rahibəm itaətdə!..
    
    Aman… Aman!... Bu müqəddəs vücudu mümkünmü
    Ki, bir taqım canavar zülmnən şikar eləsin?!
    Yıxıb da xaki-rəzalətdə, tapdayıb əzərək,
    Ayaqlar altına torpaq kibi nisar eləsin ?!
    
    Zəlilü-xar edərək məhbəsi-əsarətdə,
    O şanlı qollarına zülminən vurar zəncir.
    Niyə? Neçin? Hanı vicdan? Hanı ədalət bəs?
    Neçin də parlayıb etməz cahanı bir tənvir?
    
    Aləmi, ədl-ədalət üzüldü dünyadən,
    Neçin nəsibim edibsən bu zülm- dövranı.
    Ey asiman, dağıl, ey zöhrələr axın, tökülün,
    Ki, aləmi-bəşəriyyət unutdu vicdanı.
  
  
    ______________________________________________
    Teqlər:  Cəfər Cabbarlı şeirləri , 
    Cəfər Cabbarlı ana şeiri, anaya aid şeir, 
    qezeller, Cəfər Cabbarlı qezelleri, qəzəl, 
    qezel, ana şeirləri, ana haqqında şeirlər
  
#SevgiŞeirləri|#AyrılıqŞeirləri|#VətənpərvərlikŞeirləri