seirler.info
Axı orda sən varsan
(Sevinc Azadlı)
Sən hər an, hər dəqiqə mənim öz yanımdasan,
Damarımda dolaşan al rəngli qanımdasan,
Görərsən ki, ağlımda, ruhumda, canımdasan
Əgər xəncər götürüb ürəyimi tən yarsan,
Uzaqları sevirəm axı orda sən varsan
Sağalmaz mərəz məni yataqlara salıbdır,
Başımın üzərini təbib, loğman alıbdır,
Çarə gəzir gözlərim qapılarda qalıbdır,
Xəstə könlüm istəyən qış dönəmində narsan,
Uzaqları sevirəm axı orda sən varsan.
Ciyərim yanır axı özünə susamışam,
Cümlələrdə bal dadan sözünə susamışam,
Mənimçün yaş axıdan gözünə susamışam
Əlimin yetmədiyi dağ başındakı qarsan,
Uzaqları sevirəm axı orda sən varsan.
Bizimçün bu döyüşdə bilirsən ki, mən təkdim,
Şumlayıb şübhələri yerinə inam əkdim,
Ümid göyərsin deyə əzab əziyyət çəkdim,
Sən eşq adlı ağacın budaqlarında barsan,
Uzaqları sevirəm axı orda sən varsan.
21.09.2024
_______________________________________________
Teqlər: Sevinc Azadlı şeirləri
#SevgiŞeirləri|#AyrılıqŞeirləri|#VətənpərvərlikŞeirləri