seirler.info
Elə
(Aytəkin Səfərəliyeva)
Daha gecdir bir də gəlmə
Əhvalımdan xəbər bilmə
İstəmirəm heç vaxt ölmə
Yoxluğumdan sürün elə.
Qulaq batan səssizlikdən
O tay, bu tay sənsizlikdən
Üşüyəndə mənsizlikdən
Yoxluğuma bürün elə.
Sərhədləri yıxıb gəlləm
Nəyim vardı yığıb gəlləm
Ölsəm belə çıxıb gəlləm
Məzarımı dərin elə.
And-amanı pozmayacam
Səni xeyrə yozmayacam
Bir də sənə yazmayacam
Ürəyini sərin elə.
Hər arzumdan mən keçərəm
Dərt çəkərəm, qəm çəkərəm
Acısını mən içərəm
Sən çayını şirin elə.
_______________________________________________
Teqlər: Aytəkin Səfərəliyeva şeirləri
#SevgiŞeirləri|#AyrılıqŞeirləri|#VətənpərvərlikŞeirləri