seirler.info
Yarın belə bir fikri var
Yenə dindirdi məni tənəli bir naz ilə yar,
Süzülən göz-qaş ilə, incimiş avaz ilə yar.
Hər ota, hər çicəyə, yarpağa paylar gülüşün,
Bülbülə zülm eləyir, düşmən olub yaz ilə yar.
Getsə də qəlbi, gözü axtarar həsrətlə məni,
Qorxuram fikr çəkə, telləritək nazilə yar.
Görməmiş lalə dağı faləyanaq el gözəli,
"Olar"a bəli demir, nazlanır "olmaz" ilə yar.
Belə rəftar eləməz eşq ilə yansa ürəyi,
Çalmamış həsrətini yanğılı bir saz ilə yar.
Gəzir azadə küləklər kimi, almır sözümü,
İki dünyanı alar mən verən almaz ilə yar.
Mən ədalət yolunun carçısıyam zülm çağı,
Başa düşsün də, öyünsün belə ecaz ilə yar.
İstərəm ki, qoşa görmək diləsin Şəhriyarı
Qocaman mürşüdümüz Hafizi-Şiraz ilə yar.
#SevgiŞeirləri|#AyrılıqŞeirləri|#VətənpərvərlikŞeirləri