seirler.info
Ey könül, yarı istə, candan keç
Ey könül, yarı istə, candan keç,
Səri-kuyin gözət, cahandan keç!
Ya təmə kəs həyat zövqindən,
Ya ləbi-ləli-dilsitandan keç.
Mülki-təcriddir fərağət evi,
Tərki-mal eylə, xanimandan keç.
Laməkan seyrinin əzimətin et,
Bu xərab olacaq məkandan keç.
Etibar etmə mülki-dünyayə,
Etibari-ülüvvi-şandan keç.
Əhdi-dünyanın olmaz axirəti,
Gər bunu istər isən, ondan keç.
Məskənin bəzmgahi-vəhdətdir,
Ey Füzuli, bu xakidandan keç!
#SevgiŞeirləri|#AyrılıqŞeirləri|#VətənpərvərlikŞeirləri