seirler.info
Nələrsə əsir qalıb
(Sevinc Azadlı)
Düşübdür bu dünyanın çoxlu yükü çiynimə,
Gündüzlər rahatlığım, gecələr yuxum qaçıb.
Hamının qismətinə hüzurdan don biçilib,
Mənə dəli bir həyat həvəslə qucaq açıb.
Vurub, bölüb, çıxıram sonra üstə gəlirəm,
Haqq-hesabım qarışıb, cavabım kəsir qalıb.
Hərşeydən söhbət salıb yersiz çox danışıram,
Yenə də ürəyimdə nələrsə əsir qalıb.
Dünənə boylanıram, sabaha can atıram,
Müqayisə edirəm keçmişlə bu günümü.
Güləcəkmi görəsən bəs üzümə gələcək,
Gözümə tor gəlibdir görəmmirəm önümü.
Ələ salır taleyim, büdrədir ayağımı,
Arsızca davranıram, lal, kar, kor oynayıram.
Qəzayla didişirəm, əcəllə savaşıram,
Adamlar evcik- evcik, mən gor-gor oynayıram.
20.12.2024
_______________________________________________
Teqlər: Sevinc Azadlı şeirləri
#SevgiŞeirləri|#AyrılıqŞeirləri|#VətənpərvərlikŞeirləri