seirler.info
Birdə o illərə qayıtmarıq biz
(Elvin Elxanoğlu)
Gözümdə canlandı ötən illərim,
Birdə o illərə qayıtmarıq biz.
Nə gözəl günlərdi keçən günlərim,
Birdə o illərə qayıtmarıq biz.
Heç vaxt unudulmaz o yaşananlar,
Xatirəyə dönür ən gözəl anlar.
Hər şey gözəl idi bax o zamanlar,
Birdə o illərə qayıtmarıq biz.
O vaxtlar sağ idi baba-nənəmiz,
Oynamaq olardı tək düşüncəmiz,
İnsanlar saf idi, niyyətlər təmiz.
Birdə o illərə qayıtmarıq biz.
Sim maşın sürərdik, sanki sürərdik,
Bənövşə oynayıb bəndə düşərdik.
Kaş ki, uşaqlığa dönə bilərdik,
Birdə o illərə qayıtmarıq biz.
Sinif yoldaşları, məktəb illəri,
Unutmaq olarmı müəllimləri?!
Son zəng tamam ayrı saldı bizləri,
Birdə o illərə qayıtmarıq biz.
Unutmaq olarmı ilk məhəbbəti?
İlk sevgi ürəkdə qalır əbədi.
Artıq neyləsəkdə alınmaz qəti,
Birdə o illərə qayıtmarıq biz.
Ağlına gəlməyən, gəlir başına,
Hər ötən il yaş gətirir yaşına,
Gəlirsən ömrünün payız, qışına.
Birdə o illərə qayıtmarıq biz...
#SevgiŞeirləri|#AyrılıqŞeirləri|#VətənpərvərlikŞeirləri