seirler.info
Sarı gəlin
(Sevinc Azadlı)
Xətrinə kim dəyib, kim incidibdir,
Nədir üzündəki qəm sarı gəlin?
Yoxsa bulud kimi dolan qəlbindən
Gözlərin çəkibdir nəm sarı gəlin!
Bilirəm arzular var qatar-qatar,
İstəklər xəyalın qoynunda yatar,
Vaxt gələr intizar vüsala çatar,
Yetişər dediyin dəm sarı gəlin.
Boyun öz boyunu çinardan aldı,
Ay nurun dumduru üzünə saldı,
Təkcənə qismətin kənarda qaldı,
Sənə bəxt yazıldı kəm sarı gəlin.
Meh əsdi gül ətri bülbülə gəldi,
Şeh düşdü ləçəyə bir gilə gəldi,
Çaldı çoban qardaş ney dilə gəldi,
Bağrımı göynətdi bəm sarı gəlin.
03.12.2024
_______________________________________________
Teqlər: Sevinc Azadlı şeirləri
#SevgiŞeirləri|#AyrılıqŞeirləri|#VətənpərvərlikŞeirləri